Jy is geklee met geregtigheid (Deel 2): Wat is jou erfenis?

[Voorafgaande artikel: Die gelowige se posisie van geregtigheid voor God (Deel 1) en wat die betekenis daarvan is.]

Hy wat ons verlos het uit die mag van die duisternis en oorgebring het in die koninkryk van die Seun van sy liefde… Kol 1:13

Daarom, as iemand in Christus is, is hy ‘n nuwe skepsel; die ou dinge het verbygegaan, kyk, dit het alles nuut geword. 2 Kor 5:17

Dié Skrif sê dat ons in Christus nuwe skepsels is! Die ou dinge van ons verlede is verby! Ons is uit die mag van die duisternis oorgebring na die LIG! Ons kan nou in ons stand (posisie) van geregtigheid, deel hê aan die erfenis van die heiliges (kinders van God) (Kol.1:12). In Deel 2 oor geregtigheid, fokus ons meer op die IMPLIKASIE van wat ons posisie van geregtigheid beteken en wat ons erfenis as kinders van God is. Deur ‘n gebrek aan kennis oor dit wat ons erfenis is, mis ons die volle betekenis van wat God vir ons in gedagte het. Onkunde sal ons verhoed om as OORWINNAARS (Rom 8:37) ‘n lewe van OORVLOED te geniet (Joh 10:10).

Die duisternis is oorwin

Die vyand (duiwel, Satan) het van die begin af die mens probeer verlei met sy leuens.
- Joh 8:44 Julle het die duiwel as vader, en die begeertes van julle vader wil julle doen. Hy was ‘n mensemoordenaar van die begin af en staan nie in die waarheid nie, omdat daar in hom geen waarheid is nie. Wanneer hy leuentaal praat, praat hy uit sy eie, omdat hy ‘n leuenaar is en die vader daarvan.
Hy het die mens beroof van sy liefdesverhouding met God en die mens het daarmee saam sy erfenis en vermoë om te heers oor die aarde verloor.
- Joh 10:10 Die dief kom net om te steel en te slag en te verwoes.
Jesus het die magte van duisternis reeds oorwin. Hy het die vyand verslaan en oorwinning oor hom behaal.
- Kol 2:15 nadat Hy die owerhede en magte uitgeklee en hulle in die openbaar tentoongestel en daardeur oor hulle getriomfeer het.
Jesus het alle mag en gesag weer teruggeneem.
- Matt 28:18 En Jesus het nader gekom en met hulle gespreek en gesê: Aan My is gegee alle mag in die hemel en op aarde.

Jesus het oorwinning oor die Satan en al sy bose magte bewerkstellig. God het ons verlos van die magte van die duisternis en oorgebring na die Koninkryk van die Seun van Sy liefde, m.a.w. na Sý lig en die dinge van die lig.

ONS ERFENIS IN CHRISTUS IS dinge van die LIG en NIKS van die dinge van die DUISTERNIS nie. Wanneer ek Jesus as my Verlosser aanvaar en ek verstaan my posisie van geregtigheid voor God, kan ek dit wat my erfenis is, begin glo, bid en daarop fokus om dit my eie te maak.

Die erfporsie is reeds joune

As kind van God behoort die erfenis in Christus reeds wettiglik aan jou. Ons erfporsie is iets wat ons met selfvertroue moet opneem. Wanneer iemand nie sy posisie van geregtigheid voor God ken nie, kan ons glo dat ons dit nie verdien nie en met ’n gesindheid van minderwaardigheid rondloop. Met ’n onwaardige siening oor onsself, kan ons nie die volle voordeel van die erfenis geniet nie. Om in ons posisie van geregtigheid en in ons erfenis te wandel, moet ’n lewenswyse word. Dit is nodig dat my denke en my wandel totaal daardeur oorskadu word.

Hierdie konsep kan baie mooi aan die hand van die volgende voorbeeld verduidelik word:

Veronderstel iemand skenk aan 2 boemelaars op straat elk ’n miljoen rand. Daar word vir hulle ’n bankrekening oopgemaak in hul naam. Hulle kry alleen volle onttrekkingsreg op hul eie rekenings. Hulle het geen spesiale toestemming nodig om die geld te onttrek nie. Daar is ook niks wat hulle hoef te doen om te kwalifiseer om ’n ontrekking te maak nie. Hulle hoef nie eers te stort, skoon klere aan te trek óf te werk om dit te verdien nie. Dis gratis. ’n Geskenk. Hulle kan bloot die geld gaan trek en dit geniet soos hulle wil.

Boemelaar A staan op, sê baie dankie en hy aanvaar dit. Hy gaan onttrek die geld en koop vir hom na sy behoefte. Hy begin ’n nuwe lewe. Die lewe as boemelaar is verby. Hy geniet die volle voordeel van sy geskenk.

Boemelaar B daarenteen sê: “Dit is te goed om waar te wees en buitendien glo ek nie dat ek dit werd is nie. Hoekom sal iemand dit vir mý wil doen? Ek het niks gedoen om dit te verdien nie.” Sy minderwaardigheid en ongeloof oor die erfporsie, laat hom ’n vuil boemelaar bly en hy gaan voort om uit vullisblikke te eet. Hy is wettiglik ’n miljoenêr, maar uit eie keuse strompel hy voort met sy lewe as boemelaar. Al wat hy moet doen, is om die keuse te maak om sy rug te draai op die verlede en ’n nuwe lewe te ontvang wat wettiglik reeds aan hom behoort. Hy hoef net dit wat reeds aan hom behoort, te gaan opeis.

Ons is Koningskinders met ’n erfporsie wat wag om in besit geneem te word. Soos die boemelaars, is dit ons keuse of ons dit gaan ontvang, benut en geniet en of ons dit van die hand gaan wys. Kol. 1 :13 sê dat ons verwyder is uit die mag van die duisternis. Ons lewe nou in die lig – dit wat ons erfenis in Christus is.

Daarom is jy nie meer dienskneg nie, maar kind; en as jy kind is, dan ook erfgenaam van God deur Christus. Gal 4:7

Let wel, om kind van God te word, nie noodwendig vir ons ‘n lewe van maanskyn en rose belowe nie, maar wat ons glo, wat ons praat, dink en bid, moet oorskadu wees met die beloftes in God se Woord. Dit geld vir wanneer dit met ons goedgaan en ook vir wanneer ons enige vorm van swaarkry en beproewing in ons lewe ervaar.

Jesus het self gesê dat daar in hierdie lewe swaarkry en verdukking sal wees. Jakobus moedig die gelowige aan om in beproewing te volhard (Jak. 1:2-4). Ons doen dit deur ons denke, gedagtes en ons fokus ten volle op ons erfenis en die beloftes van God in Sy Woord te plaas.

Dit het Ek vir julle gesê, dat julle in My vrede kan hê. In die wêreld sal julle verdrukking hê; maar hou goeie moed, Ek het die wêreld oorwin. Joh 16:33

Wát is jou erfenis as kind van GOD?

Om te weet watter dinge in die wêreld hoort tot die verlede en watter dinge ons erfenis is, gebruik ons die meegaande diagram. Aan die linkerkant van die kruis is alles wat hoort by die duisternis (verlede). Regs is dit wat ons erfenis in die lig (in Christus) is. Die dinge aan die linkerkant is die gevolge van die sondeval en die feite en realiteite waarmee ons in die lewe gekonfronteer word. Regs is die lewe, waarheid en oorwinning in Jesus. God het reeds die oorwinning bewerkstellig. Daar sal altyd aanslae en versoekings in die lewe wees, maar daarvoor het Jesus ook reeds gesterf.

Vervolgens kyk ons na wat beteken die erfenis prakties in my en jou lewe?

1. OORTREDINGS/ONGEREGTIGHEID VS ONSKULD/ VRYSPRAAK

Jes 53:5 Maar Hy is ter wille van ons oortredinge deurboor, ter wille van ons ongeregtighede is Hy verbrysel;
2 Kor 5:19 naamlik dat God in Christus die wêreld met Homself versoen het deur hulle hul misdade nie toe te reken nie en die woord van die versoening aan ons toe te vertrou.
Rom 4:25 wat oorgelewer is ter wille van ons misdade en opgewek is ter wille van ons regverdigmaking.

In deel 1 het ons reeds hierna gekyk… A.g.v. die misdade en oortredings van die mensdom, is Jesus oorgelewer. Hy moes gestraf word en die volle prys vir die sondeval betaal. Omdat Hy sondeloos was, het God Hom as volmaakte offer aanvaar en die mensdom is regverdig verklaar. Die mens staan nou in onskuld, vrygespreek en in geregtigheid voor God. Daarna kon Jesus opgewek word uit die dood. Hý is in ons plek deurboor, sodat ons onskuldig verklaar kon word. Jesus het reeds die VOLLE prys betaal. Ons kan niks meer daaraan toevoeg om guns voor God te hê nie.

Al wat God nou van ons as verlostes vra, is gehoorsaamheid aan Sy opdrag: Liefde vir God en liefde vir ons naaste. Ons erfenis is volkome vryspraak en ‘n posisie van geregtigheid voor God. Ons kan nou met die grootste vrymoedigheid direk tot God bid en met Hom praat. Dit is nie nodig vir die mens om meer by die tempel offers te bring of deur ‘n hoëpriester of profeet met God te kommunikeer nie. Die voorhangsel van die tempel wat skeiding tussen die allerheiligste (daar waar God se teenwoordigheid by die tabernakel en later by die tempel manifesteer het ) en die mens gebring het, het geskeur toe Jesus sterf. Die Gees van God is op die gelowiges uitgestort! Dit maak vandag nog direkte kommunikasie tussen God en die mens moontlik.

Jou erfenis: Jy is volkome vrygespreek en geklee met ‘n kleed van geregtigheid. Dus het jy direkte vrye toegang tot God. Op grond van jou geregtigheid voor Hom, kan jy met volle vrymoedigheid tot Hom nader.

2. KRANKHEDE EN SIEKTE VS GENESING

Jes 53:4-5 Nogtans het Hy óns krankhede op Hom geneem, en óns smarte–dié het Hy gedra; maar óns het Hom gehou vir een wat geplaag, deur God geslaan en verdruk was. Maar Hy is ter wille van ons oortredinge deurboor, ter wille van ons ongeregtighede is Hy verbrysel; die straf wat vir ons die vrede aanbring, was op Hom, en deur sy wonde het daar vir ons genesing gekom.
Matt 8:16-17 En toe dit aand geword het, het hulle baie na Hom gebring, wat van duiwels besete was; en Hy het die geeste met ‘n woord uitgedrywe; en almal wat ongesteld was, het Hy gesond gemaak, sodat vervul sou word wat gespreek is deur Jesaja, die profeet, toe hy gesê het: Hy het ons krankhede op Hom geneem en ons siektes gedra.
Luk 4:18-19 Die Gees van die Here is op My, omdat Hy My gesalf het om die evangelie aan die armes te bring. Hy het My gestuur om die wat verbryseld van hart is, te genees; om aan gevangenes vrylating te verkondig en aan blindes herstel van gesig; om die wat gebroke is, in vryheid weg te stuur; om die aangename jaar van die Here aan te kondig.
1 Pet 2:24 wat self ons sondes in sy liggaam op die kruishout gedra het, sodat ons die sondes kan afsterwe en vir die geregtigheid lewe; deur wie se wonde julle genees is.

Siekte en krankhede is ‘n realiteit van ons lewe vandag en ’n feit wat ons nie kan ontken nie. Die Skrif stel dit egter duidelik dat Jesus hiervoor gesterf het en die volle prys vir elke siekte betaal het. Ons kan met volle vrymoedigheid na Vader gaan en op die beloftes van genesing staan. Al sien ons dit nie altyd manifesteer in ons eie lewens of in ander vir wie ons bid nie, kan ons steeds met vrymoedigheid hierdie erfenis ons eie maak en dit bly vra in Jesus se Naam.

Ietsie persoonlik: Ek skryf hierdie as ‘n persoon wat alreeds meer as 25 jaar elke dag uitdagings met my gesondheid het en die grootste deel van my lewe met pyn leef. Soms gaan dit beter, maar soms wil ek sommer net huil en huil oor die beperkinge en uitdagings in my lewe. Ek herinner myself voortdurend aan die beloftes van God in Sy Woord ten opsigte van genesing. Ek glo met my hele hart dat Hy in een oomblik kan gesond maak. Die redes waarom dit nie gebeur nie, weet en glo ek met ‘n vaste vertroue dat Hy in beheer is en daar ‘n goeie rede is waarom dit wat ek ervaar, deel van die storie van my lewe moet wees. Ek ag dit louter vreugde om deur die smeltkroes van lyding te sien hoe Vader my vorm en dinge leer wat ek op géén ander manier sou leer nie. As ek dit nie self aan my lyf gevoel het nie, was dit wat ek hier skryf net boekekennis en nie ‘n uit die hart getuienis nie!

Ek het al soveel bonatuulike ingrype van God in situasies gesien, dat ek onwrikbaar glo dat genesing wel deel is van ons erfenis in Christus.

Jou erfenis: Hy wil jou siektes en krankhede (ook jou gebroke hart) genees. Ons kan met vrymoedigheid vir genesing vir onsself en vir ander bid.

3. SMARTE VS VREUGDE

Jes 53:3 Hy was verag en deur die mense verlaat, ‘n man van smarte en bekend met krankheid;

Jesus het alle smarte, in alle terreine van ons lewe, op Hom geneem. Vir elke area van ons lewe (ons roeping, huwelik, finansies, verhoudings, gesondheid…) waarin ons smarte sou kon verduur, moet ons weet dat Jesus die prys betaal het, dat ons vreugde kan hê. Die realiteit van die lewe op aarde, is dat ons nie volkome gevrywaar van smarte en verdrukking in hierdie wêreld is nie. Jesus het self gesê:

Joh 16:33 …In die wêreld sal julle verdrukking hê; maar hou goeie moed, Ek het die wêreld oorwin.
John 16:33 (Amp) I have told you these things, so that in Me you may have [perfect] peace and confidence. In the world you have tribulation and trials and distress and frustration; but be of good cheer [take courage; be confident, certain, undaunted]! [I have deprived it of power to harm you and have conquered it for you.].

Hy het reeds die oorwinning behaal, sodat ons in elke verdrukking, elke smart, op Hóm, wat die oplossing is, kan fokus. My fokus bepaal wat ek gaan ervaar tydens verdrukking en swaarkry. God wil hê dat ons ‘n lewe van oorvloed en vreugde moet ervaar ook midde-in elke krisis wat ons pad mag kruis. Hý is die oplossing en antwoord in ELKE situasie. As ek op die krisis fokus, gaan dít my oorweldig. As ek op die oplossing fokus, sal ek die vreugde van oorwinning ervaar.

Joh 10:10 Die dief kom net om te steel en te slag en te verwoes. Ek het gekom, dat hulle lewe en oorvloed kan hê.

Hierdie is veral ‘n baie groot uitdaging vandag vir elke Suid-Afrikaner. Ons land is totaal oorweldig met negatiwiteit, korrupsie, misdaad, geweld en moedeloosheid. As ons fokus op hierdie dinge, gaan dit ons oorweldig en ons gaan negatiewe moedelose mense sonder hoop wees. Daar is ‘n BAIE GROOT uitdaging vir elke persoon in ons land om op God se Woord en beloftes te bly fokus en te seker te maak dat die vreugde van ons erfenis ons eie word!

In geloof moet ons, ongeag omstandighede, altyd saam met die Psalmskrywer bly bely:

Ps 23:6 Net goedheid en guns sal my volg al die dae van my lewe…

Jou erfenis: Hy wil jou smarte verander in vreugde. God gee ons die vermoë om vreugde te hê in ELKE omstandighede.

[Lees ook hiermee saam die artikel: Waarom nog oorlog as Jesus reeds die oorwinning behaal het? ]

4. STRAF VS ONVOORWAARDELIKE LIEFDE

Jes. 53:5 die straf wat vir ons die vrede aanbring, was op Hom,

Ons het reeds gesien dat ons volkome vrygespreek is deur Jesus se offer. As ons vrygespreek is, is daar enige oortredinge waarvoor Jesus nie gesterf het nie? Nee, Hy het die VOLLE prys betaal! (Daar bly net een straf en oordeel oor aan die einde = vir hulle wat nie die offer aanvaar het nie.) God se liefde vir ons is onvoorwaardelik! Daar is dus geen voorwaardes meer om vrygespreek te word nie.

Kan God ons vandag nog straf vir enige oortredinge? Nee, want Hy het alle straf op Jesus laat neerkom. Deur te sê dat God ons vandag nog straf, maak ons die offer van Jesus minderwaardig en besef ons nie die volle implikasie van Sy offer nie.

As ons reeds vrygespreek is, beteken dit dan dat ons kan sondig soos ons wil en dit sal geen effek hê nie, want ons kan nie gestraf word nie? Nee! Indien iemand so ’n gesindheid openbaar, het hy/sy beslis nog nie die wonder van ’n ontmoeting met die lewende God as werklikheid ervaar nie. ’n Persoon wat waarlik in die lig van God gekom het en God se liefde ervaar het, sal begeer om in gehoorsaamheid in daardie lig en liefde te wandel. Die vrug in ‘n persoon se lewe, is aanduidend of hy in ‘n persoonlike verhouding met die Here leef al dan nie.

Daar is ook geestelike beginsels wat vir elke persoon, gelowig en ongelowig, geld. Een so ’n beginsel, is die saai en maai beginsel. Ek kan volkome vrygespreek wees vir dinge wat ek verkeerd doen, maar ek gaan op aarde nog steeds die gevolge van my keuses dra. Om met my motor die spoedgrens te oorskry, is ’n oortreding van die land se wette. As ek as vrygespreekte gelowige besluit om enige wet te oortree, sal ek die gevolge van my keuse dra. Ek sal die boete moet betaal. As ek steel, bedrog pleeg of enige vorm van strafbare oortreding begaan, sal ek tronk toe gaan.

Jou erfenis: Hy wil jou bederf met onvoorwaardelike liefde. Jesus het reeds die VOLLE prys betaal. Wandel dan in God se onvoorwaardelike liefde vir jou.

5. VREES VS VREDE/BESKERMING

God is ons Vader en Sy hart vir ons is net voorspoed vir ‘n hoopvolle toekoms (Jer. 29:11). Ons stand voor Hom is volkome geregtig, dus het ons geen rede om Hom te vrees nie. Dikwels weerhou vrees vir God en vrees vir Sy straf en tugtiging mense van vrymoedigheid om ’n intieme liefdesverhouding met God te hê. Wanpersepsies oor God se Vaderhart en Sy karakter, weerhou mense van die volle vreugde van hulle erfenis.

Matt 7:11 As julle wat sleg is, dan weet om goeie gawes aan julle kinders te gee, hoeveel te meer sal julle Vader wat in die hemele is, goeie dinge gee aan die wat Hom bid!

Meer as wat ons as aardse vaders en moeders begeer om net die beste vir ons kinders te gee, wil die Hemelse Vader vir ons, Sy kinders, net die beste gee.

As ek God nie hoef te vrees nie, wat anders kan ek nog vrees?

Joh 10:10 Die dief kom net om te steel en te slag en te verwoes.
1 Pet 5:8 Wees nugter en waaksaam, want julle teëstander, die duiwel, loop rond soos ‘n brullende leeu, en soek wie hy kan verslind.

Daar is ’n vyand wat rondloop soos ’n brullende leeu (LW “SOOS” een, hy is nie een nie!) en dit is hý wat kom steel, slag en verwoes in ons lewens. Die vyand is egter reeds oorwin en daarom het hy geen reg om in ons lewens te steel, slag en verwoes nie. As erfgename van ’n nuwe verbond met beter beloftes, geniet ons beskerming teen die vyand se verwoesting. Om nie in vrees te lewe vir die vyand se aanslae nie, is dit nodig dat ons sal kennis dra en wandel in die beginsels van die beloftes, om dit ons eie te maak. ’n Volkome oorgegewe liefde vir God en ’n vertroue dat Hy nie lieg oor Sy beloftes nie, sal maak dat ons Hom volkome kan vertrou. Daar is dus geen plek meer vir vrees in ons lewens nie.

‘n Volmaakte liefde vir God, lei tot ’n vaste vertoue op Sy beloftes en dit sal alle vrees na buite dryf.

Tim 1:7 Want God het ons nie ‘n gees van vreesagtigheid gegee nie, maar van krag en liefde en selfbeheersing.
1 Joh 4:18 Daar is geen vrees in die liefde nie; maar die volmaakte liefde dryf die vrees buite, want die vrees sluit straf in, en hy wat vrees, het nie volmaak geword in die liefde nie.

Die vernietiging wat die vyand bring en die werke van sy hande, maak dat baie mense daagliks in vrees lewe. God gee in die Woord vir ons etlike beloftes rondom beskerming. Ons moet hierdie beloftes deel van ons denke maak, dit daagliks mediteer en ons sal vry kom van alle vrese. Verklaar dat jy geklee is met die kleed van geregtigheid en dat die vyand geen reg het om by jou te kom steel nie. (Sien ook artikel oor jou IDENTITEIT in Christus!)

Ps 91:4-6 Hy sal jou dek met sy vlerke, en onder sy vleuels sal jy skuil; sy trou is ‘n skild en pantser. Jy hoef nie te vrees vir die skrik van die nag, vir die pyl wat bedags vlieg nie, vir die pes wat in die donker wandel, vir die siekte wat op die middag verwoes nie!
Ps 91:14 Omdat hy My liefhet, sê God, daarom sal Ek hom red; Ek sal hom beskerm, omdat hy my Naam ken.
Ps 91:11 want Hy sal sy engele aangaande jou bevel gee om jou te bewaar op al jou weë.
Heb 1:14 Is hulle nie almal dienende geeste (engele) wat vir diens uitgestuur word ter wille van die wat die saligheid sal beërwe nie?
Ps 103:20 Loof die HERE, sy engele, kragtige helde wat sy woord volbring, in gehoorsaamheid aan die stem van sy woord!

Jou erfenis: ‘n Lewe vry van vrees en totaal oorgegee aan die beloftes van God se Woord. Hy wil jou beskerm en Sy vrede gee, sodat jy nie in vrees hoef te lewe nie.

6. ARMOEDE VS OORVLOED/ RYKDOM

In die ou verbond sien ons dat die eerste belofte wat God aan Abraham maak, is ’n belofte van oorvloedige seën.

Gen 12:2 En Ek sal jou ‘n groot nasie maak en jou seën en jou naam so groot maak, dat jy ‘n seën sal wees.

God brei hierdie beloftes van seën nog verder uit aan die nageslag van Abraham.

Deut 28:2-6 En al hierdie seëninge sal oor jou kom en jou inhaal as jy luister na die stem van die HERE jou God. Geseënd sal jy wees in die stad, en geseënd sal jy wees indie veld. Geseënd sal wees die vrug van jou liggaam en die vrugte van jou land en die vrug van jou vee, die aanteel van jou beeste en die aanteel van jou kleinvee. Geseënd sal wees jou mandjie en jou bakskottel. Geseënd sal jy wees by jou ingang, en geseënd sal jy wees by jou uitgang.

Deur die hele geskeidenis van Israel is welvaart en voorspoed deel van God se seën vir Sy volk. Die Here wou Sy verbond met Sy volk bevestig deur aan hulle krag te gee om rykdom te verwerwe.

Deut 8:18 Maar dink aan die HERE jou God, dat dit Hy is wat jou krag gee om rykdom te verwerwe, dat Hy sy verbond kan bevestig wat Hy aan jou vaders met ‘n eed beloof het, soos dit vandag is.

Ons is erfgename van die beter verbond met beter beloftes. Nie net die seëninge wat in die ou verbond belowe is nie, maar ook nog beter beloftes, is vir ons as erfgename van die beter verbond.

Heb 8:6 Maar nou het Hy ‘n voortrefliker bediening verkry vir sover Hy ook Middelaar is van ‘n beter verbond wat op beter beloftes wettelik gegrond is.
Gal 3:14 sodat die seën van Abraham na die heidene kan kom in Christus Jesus, en dat ons die belofte van die Gees deur die geloof kan ontvang.
Gal 3:29 En as julle aan Christus behoort, dan is julle die nageslag van Abraham en volgens die belofte erfgename.

’n Lewe in oorvloed beteken VEEL meer as om finansiële rykdom te hê. God wil hê dat dit in alles met ons moet goedgaan – na liggaam, siel en gees. Hy wil in elke behoefte van ons vervul! Mens kan skatryk wees aan besittings, maar arm en leeg aan rykdom van insig, wysheid, geluk, vreugde, vrede of liefde.

Joh 10:10 Die dief kom net om te steel en te slag en te verwoes. Ek het gekom, dat hulle lewe en oorvloed kan hê.
3 Joh 1:2 Geliefde, ek wens dat dit met jou in alles goed mag gaan en dat jy gesond is, soos dit met jou siel goed gaan;
Fil 4:19 En my God sal elke behoefte van julle vervul na sy rykdom in heerlikheid deur Christus Jesus.
2 Kor 9:10-11 En mag Hy wat saad verskaf aan die saaier, ook brood verskaf om te eet en julle saad vermeerder en die vrug van julle geregtigheid laat toeneem, sodat julle in alles ryk kan word tot alle milddadigheid, wat danksegging aan God deur ons bewerk.

HIerdie beloftes beteken nie dat alle gelowiges skatryk gaan word as hulle Jesus aanneem nie. Dit is ‘n wanpersepsie wat deur sommige teologieë voorgehou word. Matt. 6:33 sê dat ons in die eerste plek eers die Koningsheerskappy en dit wat voor Hom reg is, moet soek, dan sal God vir ons die ander dinge byvoeg. As ons fokus is om in aardse dinge ryk te wees, mis ons die punt. Sy verhouding met elke persoon is uniek. Hy sal vir jou volgens jou behoefte voorsien en vir jou op ‘n unieke manier sorg. Hoe kosbaar is dit om mense te ontmoet wat in relatiewe eenvoud en armoede leef, maar as mens skatryk is in liefde vir die Here en uit wie die vreugde en lig soos ‘n kosbare skat skyn. Jesus was skatryk aan wysheid en die teenwoordigheid van die Gees van God, nogtans het Hy geen aardse welvaart of besittings gehad nie. Na watter tipe rykdom streef jy?

Jou erfenis: ‘n Lewe van oorvloed (na liggaam, siel en gees) waarin God se Koninkryk ons hoogste doel is.

7. GEVANGENIS/ “BONDAGE” OF VERSLAWING VS VRYLATING/ VERGIFNIS

Luk 4:18-19 Die Gees van die Here is op My, omdat Hy My gesalf het om die evangelie aan die armes te bring. Hy het My gestuur om die wat verbryseld van hart is, te genees; om aan gevangenes vrylating te verkondig en aan blindes herstel van gesig; om die wat gebroke is, in vryheid weg te stuur; om die aangename jaar van die Here aan te kondig.

Baie mense word deur verskillende dinge gevange gehou vanweë hulle onkunde oor hul stand van geregtigheid en van die volle vryspraak wat daar in Christus is. Onkunde oor wie hulle is en wat hulle erfenis is, hou mense gevange in minderwaardigheid en in ’n onvermoë om hul erfporsie op te neem. Jesus self het gesê:

Matt 22:29 Toe antwoord Jesus en sê vir hulle: Julle dwaal, omdat julle die Skrifte nie ken nie en ook nie die krag van God nie.

Jesus het vir elke binding (demonies, siekte, verslawings, minderwaardigheid, depressie, hoogmoed, houvas van geld of mag, losbandigheid…) gesterf. Hy het gekom om vrymaking van alle bindinge en verslawinge aan te kondig. Hy het alle magte en kragte reeds oorwin. Ons erfenis is om volkome vry van enige bindinge te lewe. Onkunde hieroor beroof ons van ’n lewe van vryheid, oorwinning, vreugde, geestelike groei en intimiteit met God.

Ons kan vrylating kry van alle leuens wat ons vashou en wat ons verhoed om in die volle oorwinning en vreugde van ons erfenis te wandel. Daar is GEEN sonde waarvoor Jesus NIE gesterf het nie. Volkome vergifnis en ‘n stand van geregtigheid is vir elkeen beskikbaar wat sy sonde voor God bely en aanvaar dat Jesus se bloed hom skoonwas. As jy dit nog nie ontvang het nie, wil jy nie vandag jou tot Jesus keer, vergifnis vra en die volkome vryspraak wat vir jou bedoel is, in ontvangs neem nie? Die Here roep jou en wag vir jou! Sien jouself soos wat God jou sien, volkome vrygespreek van alles van jou verlede.

Jou erfenis: Volkome vrymaking van ALLE bindinge, sodat jy in vreugde, in vryheid en in oorwinning jou geestelike pad kan wandel. Hy wil jou vrymaak van bindinge en verslawings van die verlede.

8. VLOEK VS SEËN

As gevolg van die sondeval, het God die man, die vrou, die slang en die aarde vervloek (Gen.3:14-19). Die hele mensdom is hierdeur vervloek. Christus het egter aan die kruis hierdie vloek op Hom geneem, sodat ons vry kon kom van die vloek van die sondeval.

Gal 3:13-14 Christus het ons losgekoop van die vloek van die wet deur vir ons ‘n vloek te word–want daar is geskrywe: Vervloek is elkeen wat aan ‘n hout hang— sodat die seën van Abraham na die heidene kan kom in Christus Jesus, en dat ons die belofte van die Gees deur die geloof kan ontvang.
Deut 21:22-23 En as in iemand ‘n sonde is wat die doodstraf verdien en hy gedood word en jy hom aan ‘n paal ophang, dan mag sy lyk nie aan die paal oornag nie, maar jy moet hom sekerlik dié dag nog begrawe; want een wat opgehang is, is deur God vervloek.

Christus was vervloek deur aan die kruishout te hang. Hierdeur het Hy vir ons ‘n VLOEK geword. Die ware kinders van Abraham is hulle wat GLO (Gal. 3:7). Elke persoon wat glo in Jesus Christus is die erfgenaam van die SEÉN wat God aan Abraham beloof het. Dit beteken dat ons deur geloof in die offer van Jesus Christus, die Gees wat belowe is ontvang (Gal.3:14). Ons lewe deur die Gees, daarom moet die Gees ons leefstyl bepaal (Gal. 5:25).

Jou erfenis: Jesus het die VLOEK van sonde ten volle gedra. As ons in Hóm glo, ontvang ons die SEËN van die Gees van God wat in ons woon. Hy het die vloek van ‘n lewe sonder Hom, omgedraai in die uitstorting van die seën van die Heilige Gees saam met jou.

9. WERKE VAN VLEES VS BEDIENING VAN DIE HEILIGE GEES

Gal 5:16-17 Maar ek sê: Wandel deur die Gees, dan sal julle nooit die begeerlikheid van die vlees volbring nie; want die vlees begeer teen die Gees, en die Gees teen die vlees; en hulle staan teenoor mekaar, sodat julle nie kan doen wat julle wil nie.

Wat is die werke van die vlees?

Gal 5:19-21 En die werke van die vlees is openbaar, naamlik owerspel, hoerery, onreinheid, ongebondenheid; afgodery, towery, vyandskap, twis, jaloersheid, toornigheid, naywer, tweedrag, partyskap; afguns, moord, dronkenskap, brassery en dergelike dinge, waarvan ek julle vooraf sê, soos ek al vroeër gesê het, dat die wat sulke dinge doen, die koninkryk van God nie sal beërwe nie.

Hierdie is karaktereienskappe van die duisternis en nie eienskappe van die lig nie. God het aan ons die Heilige Gees gegee, sodat ons kan onderskei tussen lig en duisternis. Wanneer ons Jesus as ons Verlosser aanneem, word ons liggame die tempel waarin die Heilige Gees woon. Dit is die Gees wat ons voortdurend begelei en leer om onderskeid te kan tref tussen ‘n lewe wat deur die vlees oorheers word en die vrug van ‘n Geesvervulde lewe. Hoe meer sensitief ons vir die leiding van die Heilige Gees is, hoe meer sal ons lewens die vrug dra wat in lyn is met die karakter van die Gees.

Die eienskappe van ’n Geesvervulde lewe is:

Gal 5:22-25 Maar die vrug van die Gees is liefde, blydskap, vrede, lankmoedigheid, vriendelikheid, goedheid, getrouheid, sagmoedigheid, selfbeheersing. Teen sulke dinge is die wet nie. Maar die wat aan Christus behoort, het die vlees met sy hartstogte en begeerlikhede gekruisig. As ons deur die Gees lewe, laat ons ook deur die Gees wandel.

Jou erfenis: ‘n Lewe wat nie meer deur die werke van die vlees oorheers word nie, maar die vrug van die Gees van God toon. Die Gees lei en leer ons om te onderskei tussen Lig en Duisternis. Die Gees kan ons nou leer om in ‘n noue verbintenis met God te wandel.

Neem jou erfenis in besit

As ons ons posisie van geregtigheid (vryspraak) voor God werklik verstaan, moet ons dit in geloof ontvang en ons eie maak. Hoe doen ons dit? Ons ontvang dit deur op elkeen van die bogenoemde aspekte ons gedagtes so te fokus dat dit die fondasie van ons denke, woorde, geloof, gebede, dade en ons intimiteit met God sal word.

Dit waarop jy fokus, sal wys in jou wandel.

Matt 12:34 … Want uit die oorvloed van die hart praat die mond.
Ps 1:1-3 Welgeluksalig is die man wat nie wandel in die raad van die goddelose en nie staan op die weg van die sondaars en nie sit in die kring van die spotters nie; maar sy behae is in die wet van die HERE (die Woord van God), en hy oordink sy wet dag en nag. En hy sal wees soos ‘n boom wat geplant is by waterstrome, wat sy vrugte gee op sy tyd en waarvan die blare nie verwelk nie; en alles wat hy doen, voer hy voorspoedig uit.
Jos 1:8 Hierdie wetboek (die Woord van God) mag nie uit jou mond wyk nie; maar bepeins dit dag en nag, sodat jy nougeset kan handel volgens alles wat daarin geskrywe staan; want dan sal jy in jou weë voorspoedig wees, en dan sal jy met goeie gevolg handel.
Deut 6:5 -9 Daarom moet jy die HERE jou God liefhê met jou hele hart en met jou hele siel en met al jou krag. En hierdie woorde wat ek jou vandag beveel, moet in jou hart wees; en jy moet dit jou kinders inskerp en daaroor spreek as jy in jou huis sit en as jy op pad is en as jy gaan lê en as jy opstaan. Ook moet jy dit as ‘n teken bind op jou hand, en dit moet as ‘n voorhoofsband tussen jou oë wees. En jy moet dit op die deurposte van jou huis en op jou poorte skrwywe.
Deut 28:1-2 As jy dan goed luister na die stem van die HERE jou God om sorgvuldig te hou al sy gebooie wat ek jou vandag beveel, dan sal die HERE jou God jou die hoogste stel bo al die nasies van die aarde. En al hierdie seëninge sal oor jou kom en jou inhaal as jy luister na die stem van die HERE jou God.

OPSOMMING van jou erfenis:

Jesus het alle ongeregtigheid om Hom geneem. Jy is volkome vrygespreek en geklee met ‘n kleed van geregtigheid.
Hy wil jou krankhede, siektes en gebroke hart genees.
Hy wil jou smarte verander in vreugde.
Daar is nou geen straf meer nie. Hy wil jou bederf met onvoorwaardelike liefde.
Hy wil jou beskerm en Sy vrede gee, sodat jy nie in vrees hoef te lewe nie.
Hy wil al jou armoede wegneem en jou seën met oorvloed en rykdom in alle aspekte van jou lewe (LW rykdom beteken nie noodwendig geld nie).
Hy wil jou vrymaak van alle bindinge van die verlede.
Hy het die vloek van ‘n lewe sonder Hom, omgedraai in die uitstorting van die seën van die Heilige Gees sáám met jou.
Jou lewe word nie meer beheer deur die werke van die vlees nie, maar die Gees wil jou lei en leer om in ‘n noue verbintenis met God te wandel.

Lees ook: Waarom nog oorlog as Jesus reeds die oorwinning behaal het?

Lees ook: Ken jou IDENTITEIT as kind van God