By die gelowige is daar voortdurend konflik tussen sy ou natuur en die nuwe natuur. Die konflik tussen die 2 nature vind in ons denke plaas. Hierdie oorlog is ’n magstryd oor wie jou denke beheer – lig of duisternis. Jou gedagtes is die rigtingwysers wat jou lewe gaan bepaal. Elke persoon sal tot die dag van sy dood nog worstel met vleeslike gedagtes, of begeertes wat stryd voer met die geestelike gedagtes.
- Rom 7:18 Want ek weet dat in my, dit wil sê in my vlees, niks goeds woon nie; want om te wil, is by my aanwesig, maar om goed te doen, dit vind ek nie.
- Rom 8:6 Want wat die vlees bedink, is die dood, maar wat die Gees bedink, is lewe en vrede,
- Gal 5:17 want die vlees begeer teen die Gees, en die Gees teen die vlees; en hulle staan teenoor mekaar, sodat julle nie kan doen wat julle wil nie.
Bindinge van die duisternis
Nie net ongelowiges nie, maar óók Christene kan sukkel met bindinge van die duisternis soos verslawings, pornografie, bitterheid, onvergifnis, minderwaardigheid, selfverwerping, jaloesie, ongeloof, wellus, buite-egtelike verhoudings, ens. Hoewel baie van dié bindinge simptome van demoniese teenwoordigheid by ‘n persoon is, is die oorsaak nie noodwendig ‘n demoniese aanslag nie. ELKE persoon is daagliks nog in ’n oorlogstryd gewikkel tussen sy ou natuur en sy nuwe natuur. Ons moet waak daarteen om ons onvermoë om oorwinning te behaal in ons denke, bloot net aan demone toe te skryf en sodoende nie self verantwoordelikheid neem vir die keuses wat ons maak nie.
Selfs al sou ’n persoon na wedergeboorte bevryding ontvang het, sal daar nog steeds vernuwing van denke moet plaasvind. Solank die dinge van jou ou natuur nog in jou denke heers, sal dit voortdurend jou gedagtes beïnvloed, beheer of besmet. Hoe meer daar teen sulke denke geveg word, maak ons ruimte vir Goddelike gedagtes om ons denke te oorheers. God wil ons vrymaak van ons ou natuur, maar ons moet die keuse maak om Hom toe te laat om dit te doen.
Aanklag van die verlede
‘n Emosionele wond wat nie volkome genees het nie, kan veroorsaak dat Satan steeds ‘n houvas kry in dáárdie area van die wedergebore persoon se lewe. Na sy wedergeboorte kan iemand dus steeds aanslae in dié spesifieke area van sy lewe ervaar. Sodra die gelowige nader aan God wil beweeg, of geestelik wil groei, word hierdie probleem ’n struikelblok wat die persoon laat skuldig of veroordeeld voel en die persoon draai dan ontmoedig en skaam weg van God se roepstem.
Byvoorbeeld: ‘n persoon wat voor sy wedergeboorte baie minderwaardig was agv wonde van sy verlede, kan voortdurend in hierdie area aangeval en lamgelê word ná sy wedergeboorte. Dit is nodig dat die wortel van die probleem aangespreek word, sodat volkome genesing kan plaasvind.
Seamands: “Satan’s greatest psychological weapon is a gut-level feeling of inferiority, inadequacy, and low self-worth… Low self-esteem paralyzes our potential, destroys our dreams, ruins our relationships, and sabotages our Christian service”.
Satan gebruik dus ons verlede as aanklag teen ons, sodat ons nie met vrymoedigheid voor God kan staan nie. Hierdie aanklagte veroorsaak dat so baie gelowiges nie hul identiteit in Christus in ontvangs kan neem en hul erfporsie geniet nie. Hul kan glo dat dit vir ander is, maar nie vir húlle nie, want hulle is dit nie waardig nie. Skuldgevoel, minderwaardigheid, selfveroordeling, ens. hou die persoon gevange in die houvas van Satan. Dit beroof gelowiges van lewe en oorvloed, oorwinning en die vreugde van ’n uitverkorene.
Wurm mentaliteit
Gelowiges wandel soms met ‘n “wurm mentaliteit” (Jes 41:14) en wil soos ‘n Elia onder ‘n besembos gaan wegkruip. Hierdie negatiewe denkpatrone en persepsies beroof ons van ‘n liefdesverhouding en intimiteit met God en belemmer baie ernstig ons geestelike volwassenheid.
As ons nie hierdie aanklagte van minderwaardigheid in ons gedagtes herken as die ammunisie waarmee die vyand ons aanval nie, is ons sonder enige verdediging uitgelewer in die oorlog wat hy teen ons voer. Ons moet bekend wees met sy planne en besef dat die oorlogsveld in ons gedagtes lê! Sy grootste kanon is die wanpersepsies oor ons verlede.
- 2 Kor 2:10-11 Aan wie julle iets vergewe, vergeef ek ook; want wie ek ook vergeef het–as ek iets vergeef het–dit was om julle ontwil voor die aangesig van Christus, sodat ons nie deur die Satan bedrieg sou word nie; want ons is met sy planne nie onbekend nie.
- Ef 6:12-13 Want ons worstelstryd is nie teen vlees en bloed nie, maar teen die owerhede, teen die magte, teen die wêreldheersers van die duisternis van hierdie eeu, teen die bose geeste in die lug. Daarom, neem die volle wapenrusting van God op, sodat julle weerstand kan bied in die dag van onheil en, nadat julle alles volbring het, staande kan bly.
Gooi af die kettings
Ons onvermoë om hierdie as ’n geestelike oorlog in ons gedagtes te herken, sal altyd ’n struikelblok in ons lewens bly en ons verhoed om geestelike volwassenheid te bereik. Die wonde van ons verlede sal ons dus weghou van God se plan vir ons lewens, totdat ons genesing ontvang en vrykom. Ons sal nie genees deur bloot net die realiteit van die kettings wat ons bind te ignoreer nie. Deur dit te ignoreer, waarborg ons net dat die probleem sal terugkom om ons weer te wond. Ons moet ons harte oopstel dat God die leuens van ons verlede ontbloot, ons vrymaak en ons genees.
As ons bereid is om die dinge van die verlede in die oë te kyk, sal ons genesing ontvang, die sak met “garbage” word leeggemaak, die kettings van die verlede word verwyder en ons kan dan in emosionele vryheid stap.
Satan verloor dan sy houvas oor ons, aangesien hy geen ammunisie meer het om ons verlede teen ons te gooi nie.
Wanneer Satan jou aan jou verlede herinner, herinner hom aan sý toekoms.
Wandel in vryheid
Wanneer daar enige aanklag van jou verlede weer teen jou kom, of enige skuldgevoelens, kan jy met selfvertroue wegstap in die wete dat die liefde van God jou beskerm en omring. Soos wat die wonde genees en jy al meer vryheid ervaar, sal dit mettertyd al hoe minder pynlik wees om aan die verlede te dink of herinner te word. Jy sal weet dat daar reeds baie genesing plaasgevind het, wanneer jy God kan dank vir die sleg wat in jou lewe gebeur het. Wanneer jy begin insien dat dit deel was van die storie van JOU lewe en ook van jou groei as sterk gelowige. Dan kan jy dit kan aanwend om ander te inspireer en te help.
Heiligmaking
God begeer dat ons ons ou natuur aflê en voortdurend vernuwe word om die natuur van Christus aan te neem. Hierdie proses waardeur God ons nuut maak, word HEILIGMAKING genoem en word teweeggebring deur die Heilige Gees wat in ons woon.
- 2 Kor 7:1 Terwyl ons dan hierdie beloftes het, geliefdes, laat ons ons van alle besoedeling van die vlees en die gees reinig, en laat ons die heiligmaking in die vrees van God volbring.
- Heb 12:14 Jaag die vrede na met almal, en die heiligmaking waarsonder niemand die Here sal sien nie;
- 2 Kor 3:18 En terwyl ons almal met onbedekte gesig soos in ‘n spieël die heerlikheid van die Here aanskou, word ons van gedaante verander na dieselfde beeld, van heerlikheid tot heerlikheid, as deur die Here wat die Gees is.
Die vrug van die Gees sal al hoe meer manifesteer in jou lewe. Jou siening van jouself, jou verhouding met God en met ander sal ’n radikale transformasie ondergaan. Jy sal in staat wees om in ‘n baie groter intimiteit met God te wandel.
Die koninkryk van God sou waarskynlik baie vinniger gevestig word op aarde, as alle gelowiges hul identiteit in Christus geken en aanvaar het. Hoeveel mense besef nie dat ons genoem word konings en priesters (Openb. 1:6; 5:10), kinders van God (1 Joh. 3:1) en dat ons erfgename van God en mede-erfgename van Christus (Rom. 8:14-17, Gal. 4:6-7) is nie. So dikwels sê mense aan my dat hul die Skrifte ken, maar hul voel dit geld vir ander maar nie vir hulself nie (minderwaardig).
Sien ook die artikel oor ONS IDENTITEIT IN CHRISTUS.
